22.04.2012
Verið er að prófa nýtt íslenskt lyf, unnið úr lýsi, við hægðatregðu hjá börnum sem koma á Barnapítala Hringsins.
Lyfið er þróað af Lipid Pharmaceuticals, sem er samstarfsverkefni Háskóla Íslands, Landspítala og LÝSIS. Lyfið er í formi stíla sem innihalda hreint lýsi og fitusýrur unnar úr lýsi. Þau lyf sem notuð hafa verið fram að þessu eru ekki í formi stíla, heldur gefin með sprautustútum sem er mun óþægilegra.
Tvær rannsóknir hafa verið gerðar á stílunum áður og þá á fullorðnu fólki. Niðurstöður sýna að stílarnir virka vel og eru ekki hættulegir, og nú er verið að rannsaka hvaða áhrif þeir hafa á börn.
Orri Þór Ormarsson, barnaskurðlæknir og aðalrannsakandi, segir núverandi lyf við bráðahægðatregðu nánast ekkert hafa verið rannsökuð gagnvart börnum. Líklega er hér um fyrstu rannsóknina á því sviði að ræða, en hægðatregða er eitt algengasta heilbrigðisvandamál barna á Íslandi.