11.12.2007
Lýsi hf. hefur framleitt og selt Liðamín við góðar undirtektir til nokkurra ára bæði eitt og sér sem og Lýsi & Líðamín.
Liðamíntöflur hafa verið samsettar úr glúkósamíni, kondróitíni og C-vítamíni, auk bindiefna. Nýlega var glúkósamín skilgreint sem lyf á Íslandi. Þetta þýðir að ekki er lengur heimilt að selja það í almennum verslunum eða heilsubúðum. Því hefur verið ákveðið að hætta dreifingu Liðamíns og Lýsi og Liðamíns í upprunalegri mynd og samsetningu vörunnar breytt.
Liðamínvörurnar hafa reynst vel og eru margir neytendur afar ánægðir með þann árangur, sem þeir hafa náð við reglubundna neyslu.
Í nýju vörunum kemur hýalúronsýra (hyaluronic acid) í stað glúkósamíns. Kondróitín og C-vítamín verða notuð áfram sem og ómega-3 í lýsi og Liðamín. Nýju vörurnar munu þá heita Magna Liðamín Hyal-Joint® annars vegar og Lýsi & Liðamín Hyal-Joint® hinsvegar. Hyal-Joint® (hýalúronsýra) er vörumerki spænska lyfjaframleiðandans Bioiberica. Eftir sem áður verður hægt að kaupa nýju vörurnar í stórmörkuðum, heilsubúðum sem og lyfjaverslunum. Þar með er góðu aðgengi neytenda að vörunni viðhaldið. Hýalúronsýra er fæðubótarefni sem fengið hefur verðskuldaða athygli og sendum við hér með upplýsingar um Hyal-Joint®.
Um Lýsi og Liðamín Hyal-Joint®
Óþægindi eða verkir frá liðum geta dregið úr hreyfigetu og almennum gæðum daglegs lífs þeirra sem þjást af þeim. Lýsi og Liðamín Hyal-Joint® er samansett úr efnum sem talin eru hafa jákvæð áhrif á liðina og geta viðhaldið heilbrigði þeirra.
Hyal-Joint® (Hyaluron sýra):
Í liðamótum er að finna seigfljótandi vökva sem nefnist liðvökvi. Hlutverk hans er að smyrja og viðhalda mýkt í liðamótum. Hyaluron sýra er ein af meginefnum liðvökva og hana er einnig að finna í brjóski. Eitt mikilvægasta hlutverk hennar er að auka seigju liðvökvans, draga úr núningi og óþægindum og tryggja mýkt í hreyfingum liðamóta.
Kondróítín súlfat:
Kondróítín súlfat er eitt algengasta byggingarefnið í liðbrjóski. Verkun kondróítíns er talin felast í því að hemja niðurbrotshvata sem brjóta niður brjósk í liðum. Það er einnig talið hamla bólgumyndun og vinna gegn slitgigt.
Omega-3:
Ómega-3 inniheldur fitusýrurnar EPA og DHA og talið er að ómega-3 geti dregið úr einkennum eins og stirðleika á morgnana og verkjum.
Í Liðamíni er einnig C-vítamín sem hefur hlutverki að gegna í framleiðslu líkamans á kollageni. Kollagen er prótein sem er meginuppistaðan í ýmsum tengivefjum líkamans.