Fréttir
Saga LÝSIS gefin út
28.01.2010
Í tilefni 70 ára afmælis LÝSIS var ráðist í útgáfu bókar um sögu félagsins og kom hún út í lok 2008.
Bókin hlaut heitið Gull hafsins og er þar bæði vísað til hins verðmæta efnis sem unnið er úr sjávarfangi sem og til litarins á lýsinu. Helga Guðrún Johnson og Sigurveig Jónsdóttir tóku saman efni bókarinnar.
Í bókinni er stiklað á stóru um þýðingu lýsisins fyrir Íslendinga á öldum áður, en lýsi var ein mikilvægasta verslunarvara þjóðarinnar um langt skeið. Í bókinni er farið yfir sögu fyrirtækisins og sagt frá því hvernig rannsóknir leiddu menn smám saman í allan sannleika um hollustu lýsisins. Það skiptust á skin og skúrir bæði á mörkuðunum og í rekstrinum, en á endanum stóð uppi öflugt og nútímalegt fyrirtæki, sem byggir afkomu sína að verulegu leyti á útflutningi á margvíslegum lýsisafurðum.
Bókin var aðeins prentuð í litlu upplagi en henni var dreift á allmörg bókasöfn.